Sandvikdalen - Turveg frå Sørbrandal til Sandvika

Denne turen er lett tigjengeleg for alle. Du kan køyre rullestol, jogge, gå eller sykle her.  Er det snø om vinteren, er det fint å gå på ski her. På Sørbrandal- sida har du flott utsikt innover Rovdefjorden og til Sunnmørsalpane. Kjem du over toppen på vegen, så er det storslagen utsikt til Vanylvsgapet og Stadtlandet.Turvegen fyl elva frå Sandvikvatnet på delar av strekninga, og er du heldig kan du sjå hjort som kryssar dalen, eller ørn som sirklar over.

I Sørbrandal tek du bilvegen oppover bakkane ved forsamlingshuset på vestsida av elva. Køyr til enden av asfaltert veg og parker der. Du kan også parkere nede i bygda ved brua som går over elva. Turen startar i slakt terreng. Etter kvart noko stigning med flatare parti innimellom. Det er brei grusveg heile strekninga. Det er mange rasteplassar med bord og benkar undervegs, og ved Dalebøen ovanfor austenden av Sandvikvatnet er det ein flott gapahuk. Kjem du frå Hakallestranda, køyrer du av hovudvegen i Hola. Her er det skilta mot Sandvikdalen. Du køyrer til parkeringsplassen i Sandvikdalen 240 m.o.h. (her kan du også gå til Nystøylhornet) Turvegen startar ved enden av parkeringsplassen. Det er bomveg siste delen.

Omkring høgste punktet på vegen, på Dalebøen var det ein gard i gamle dagar. Murane er no heilt forsvunne i granskogen på oppsida av vegen. I Sandvikvatnet ser du øya St.Helena. Her var det ei hytte som tilhøyrde Rønnebergslekta på Larsnes. Berre murane står att no.