Hegguraksla frå Hauge (ny)

Fin og bratt tur til varden på Hegguraksla. Her får du fin-fin utsikt over Norddalsfjorden og Tafjorden. Tek du ein kveldstur kan du få med deg deg fine fargar og solnedgang over Sunnmørsalpane i vest.

Frå parkeringsplassen på Hauge går du på asfaltveg ca 300 meter til du kjem til sætervegen på venstre side, skilta til Nysætra. Følg setervegen (grusveg) i store slyng oppover i lia til rasteplassen på Nysætra (ca 680 moh).

Vidare går du på merka sti skilta mot Heggurdalen. Stien har to startpunkt på setra, men dei går snart saman til ein tydeleg sti. Start ved utedoen eller ved skiltet litt høgare i terrenget. Gå i slakt terreng innover langs fjorden, med ei brattare stigning mot Hegguraksla, 1000 moh. Målet finn du ved ein stor varde rett ved stien.

Her har du vidt ustyn. Mot aust ser du Tafjorden og fråflytta fjordgardar på sørsida av fjorden, vidare inn mot Tafjordbygda og Tafjordfjella. Mot vest ser du Norddalsfjorden og bygdene rundt

Om du vil gå vidare kan du følgje stien i kupert og delvis luftig terreng innover og litt nedover til Heggurdalstølen. Ver merksam på eit par luftige punkt langs råsa her. La ikkje born gå åleine dette strekket.

Hegguraksla er også utgangspunkt for topptur til Blåfjellet. Det er ein lang tur.